Monday, January 10, 2011

ចៅក្រម មិនទាន់​សម្រេច​បែប​ណា​ទេ ចំពោះ​ការស្នើសុំ​ធានា​ជនជាតិ​ថៃ​ទាំង ៧ នាក់ ឲ្យនៅ​ក្រៅ​ឃុំ​

ភ្នំពេញ: រហូត​ដល់​ល្ងាច​ថ្ងៃទី​១០​មករា ឆ្នាំ​២០១១​នេះ លោកស្រី ចាំង ស៊ី​ណាត ចៅក្រម​ស៊ើបសួរ របស់​សាលាដំបូង​រាជធានី​ភ្នំពេញ ដែល​កាន់​សំណុំរឿង​ជនជាតិ​ថៃ​ទាំង ៧ នាក់ មិនទាន់​សម្រេច​បែប​ណា​នៅឡើយ​ទេ ជុំវិញ​សំណើសុំ​ធានា​ជនជាតិ​ថៃ​ទាំងនោះ នៅ​ក្រៅ​ឃុំ​ជា​បណ្តោះអាសន្ន​។​

​    ​លោកស្រី​ចៅក្រម ចាំង ស៊ី​ណាត បាន​ថ្លែងថា លោកស្រី​បាន​ទទួល​នូវ​សំណើ​របស់​មេធាវី​ទាំងនោះ​ហើយ​។ លោកស្រី កំពុង​តែ​ពិនិត្យ និង​ពិចារណា​លើ​សំណើ​សុំ​នៅ​ក្រៅ​ឃុំ​ជា​បណ្តោះអាសន្ន​នោះ​។ ពោល​គឺ លោកស្រី​ចៅក្រម មិនទាន់​សម្រេច​យ៉ាងណា​ទេ​។ ប៉ុន្តែ​បើ​តាម​ច្បាប់ លោកស្រី​មាន​ពេល​យ៉ាងយូរ​រយៈពេល ៥ ថ្ងៃ ត្រូវ​ឆ្លើយតប​ទៅកាន់​មេធាវី​ការពារ​ជនជាប់ចោទ ថា​តើ​យល់ព្រម​ឲ្យ​ជនជាតិ​ថៃ​ទាំង ៧ នាក់ នោះ ស្ថិតនៅ​ក្រៅ​មន្ទីរឃុំឃាំង​ជា​បណ្តោះអាសន្ន ឬ​មិន​យល់ព្រម​។​


​    ​ការលើកឡើង​របស់​លោក​ស្រី​ចៅក្រម​ខាងលើនេះ បាន​ធ្វើឡើង​ភ្លាមៗ ក្រោយពី​ក្រុម​មេធាវី បាន​ដាក់​ពាក្យសុំ​ធានា​ជនជាប់ចោទ​ថៃ​ទាំង ៧ នាក់ ឲ្យ​ស្ថិតនៅ​ក្រៅ​ឃុំ​ជា​បណ្តោះអាសន្ន ដោយ​មាន​បង់ប្រាក់​ធានា​។ ពាក្យសុំ​ធានា ដែល​ចុះហត្ថលេខា​រួមគ្នា ដោយ​លោក ប៉ិច វិច្ឆិកា និង​លោក រស់ អូន មេធាវី​ការពារ​ជនជាតិ​ថៃ​ទាំង ៧ នាក់ ត្រូវបាន​ដាក់​ទៅ​កាន់​ផ្នែក​រដ្ឋបាល​របស់​តុលាការ កាលពី​រសៀល​ថ្ងៃ​ទី​១០​មករា​នេះ​។​


​    ​លោក ប៉ិច វិច្ឆិកា មេធាវី​ការពារ​ជនជាតិ​ថៃ ៤ នាក់ ក្នុងចំណោម​ជនជាតិ​ថៃ​ទាំង ៧ នាក់ បាន​ថ្លែងថា ពាក្យស្នើសុំ​ធានា​កូនក្តី​របស់​លោក ឲ្យ​ស្ថិតនៅ​ក្រៅ​មន្ទីរឃុំឃាំង ជា​បណ្តោះអាសន្ន ត្រូវបាន​ដាក់​ទៅ​កាន់​តុលាការ​សាលាដំបូង​រាជធានី​ភ្នំពេញ​រួចរាល់​ហើយ នៅ​រសៀល​ថ្ងៃ​ទី​១០​មករា​។ ក្នុង​ពាក្យសុំ​ធានា​នោះ គឺ​ម្នាក់ៗ បាន​ភ្ជាប់​លុយ​ធានា​ចំនួន ១ លាន​រៀល​។ 

 
     ​លោក​មេធាវី បាន​បន្ថែមថា តាម​ការជជែក​គ្នា ខាង​ស្ថានទូត​ថៃ គេ​ក៏​ធ្វើ​លិខិត​សុំ​ធានា​ជនជាតិ​ថៃ​ទាំងនោះ ដោយ​មិន​ឲ្យ​រត់​គេច​ទៅណា ហើយ​សន្យាថា បើ​តុលាការ​ត្រូវការ យើង​នឹង​នាំ​គាត់​ទៅ​តុលាការ​។ យើង​ស្នើ​សុំ​ឲ្យ​គាត់​នៅ​ក្រៅ​ឃុំ​នេះ អម​ដោយ​លិខិតធានា​របស់​ស្ថានទូត​។ នោះ​គឺ​ជនជាតិ​ថៃ​ទាំង​៧​នាក់ នឹង​ត្រូវ​ធានា​ឲ្យ​ស្នាក់នៅ​ក្នុង​ស្ថានទូត​ថៃ ប្រចាំ​ក្រុង​ភ្នំពេញ​។  


​    ​ជនជាតិ​ថៃ​ទាំង ៧ នាក់ ដែល​រួមមាន​អ្នកតំណាងរាស្ត្រ​គណបក្ស​ប្រជាធិបតេយ្យ​ម្នាក់ និង​មេ​បាតុករ​អាវ​លឿង​ម្នាក់​ផង​នោះ ត្រូវបាន​តុលាការ​សាលាដំបូង​រាជធានី​ភ្នំពេញ ធ្វើការ​ចោទប្រកាន់​ពីបទ​ចូល​ទឹកដី​កម្ពុជា​ដោយ​ខុសច្បាប់ និង​ចូល​ក្នុង​តំបន់​យោធា ក្នុង​បំណង​ទុច្ចរិត​។ ការចោទប្រកាន់​លើ​ជនជាតិ​ថៃ​ទាំងនោះ បាន​ធ្វើ​ឡើង​តែ​មួយ​ថ្ងៃ​ប៉ុណ្ណោះ ក្រោយពី​ក្រុម​ជ្រុលនិយម​ថៃ​ទាំង ៧ នាក់ ត្រូវបាន​អាជ្ញាធរ​កម្ពុជា ចាប់ខ្លួន​កាលពី​ថ្ងៃ​ទី​២៩ ខែ​ធ្នូ ឆ្នាំ​២០១០​។ តាមច្បាប់ ជនជាតិ​ទាំង ៧ នាក់​នោះ នឹងត្រូវ​ផ្តន្ទាទោស​ដាក់​ពន្ធនាគារ ក្នុង​ម្នាក់ៗ​ចំនួន ១៨ ខែ​។ ចៅក្រម​ស៊ើបសួរ សាលាដំបូង​រាជធានី​ភ្នំពេញ បាន​បិទ​បញ្ចប់​ការស៊ើបអង្កេត​លើ​ជនជាតិ​ថៃ​ទាំង ៧ នាក់ កាល​ពី​ព្រហស្បតិ៍ ទី​៦​មករា ឆ្នាំ​២០១១៕​
 
ដោយ : លីហូវ

No comments:

Post a Comment