ភ្នំពេញ: រដ្ឋបាលព្រៃឈើបានអះអាងថាជាមួយនឹងការរឹបអូសឈើល្មើសរាប់ពាន់ម៉ែត្រគូបនិងការចាប់បានជនល្មើសជិត១០០នាក់បញ្ជូនទៅតុលាការនោះពេលនេះក៏មានសំណុំ រឿងបទល្មើសព្រៃឈើជិតមួយពាន់ករណីកំពុងនៅក្នុងដៃតុលាការដែរ ។
យោងតាមរបាយការណ៍បូកសរុបប្រចាំឆ្នាំ២០១០របស់រដ្ឋបាលព្រៃឈើបានឲ្យដឹងថា ដោយមានការចូលរួមពីស្ថាប័ន និងអង្គភាពពាក់ពន្ធ័អាជ្ញាធរមូលដ្ឋានកងកំលាំង ប្រដាប់អាវុធ សហគមន៍មូលដ្ឋាន និងអង្គការក្រៅរដ្ឋាភិបាល រដ្ឋបាលព្រៃឈើបានចាប់ឃាត់និងរឹបអូសឈើគ្រប់ប្រភេទបានសរុបប្រមាណ ១០ពាន់ ម៉ែត្រត្រីគុណ និង បានចាប់ខ្លួនជនល្មើសបញ្ជូនទៅតុលាការចំនួន ៨២នាក់ ហើយបានចងក្រងសំណុំរឿងបញ្ជូនទៅតុលាការចំនួន ១ ៣៧៧ ករណី ។
របាយការណ៍ដដែលនិយាយទៀតថា ជាមួយគ្នានេះ សំណុំរឿងដែលបានបញ្ជូនមក ត្រូវបានចាត់ថ្នាក់ទៅតាមប្រភេទបទល្មើសចំនួន ១៥០៧ ករណី ក្នុងនោះបញ្ចប់សំណុំរឿងចំនួន ៥៤២ករណី កំពុងចងក្រងសំណុំរឿង ៣០ករណី និងស្ថិតក្នុងសមត្ថកិច្ចតុលាការចំនួន ៩៣៥ ករណី ។ ចំនួនបទល្មើសក្នុងឆ្នាំ ២០១០នេះមានការកើនឡើងលើសឆ្នាំកន្លងមក ។ ប៉ុន្ដែតួលេខនេះមិនមានន័យថា មានបទល្មើសកើតឡើងច្រើនលើសឆ្នាំកន្លងមកនោះទេ តែជាសញ្ញាមួយបង្ហាញពីការខិតខំយក ចិត្ដទុកដាក់អនុវត្ដការងារកាន់តែសកម្មឡើងរបស់ថ្នាក់ដឹកនាំនិងមន្ដ្រីរដ្ឋបាលព្រៃឈើគ្រប់ជាន់ថ្នាក់ ។
កាលពីសប្តាហ៍មុននេះលោករដ្ឋមន្ត្រីក្រសួងកសិកម្មច័ន្ទ សារុន បានប្រាប់ទៅមន្ត្រី រដ្ឋបាលព្រៃឈើឲ្យធ្វើការតាមដាននិងជំរុញឲ្យបានលឿនផងដែរនូវរាល់សំណុំរឿងបទល្មើសព្រៃឈើដែលបានបញ្ជូនទៅតុលាការរួចទៅហើយ ។ លោកបានកត់សំគាល់ថា សំណុំរឿងព្រៃឈើនៅតុលាការហាក់ដូចជាយឺតយ៉ាវក្នុងការជំនុំជំរះ ។
រដ្ឋបាលព្រៃឈើក៏បានឲ្យដឹងផងដែរថា បទល្មើសកើតមានឡើងនៅក្នុងដែនដីសម្បទានសេដ្ឋកិច្ចរដ្ឋបាលព្រៃឈើក៏បានរឹបអូសនូវវត្ថុតាងបទល្មើស ព្រៃឈើ សត្វព្រៃ និងដីព្រៃឈើ និងដកហូត ដែលក្នុងនោះរួមមាន ៖ ឈើហ៊ុបមូល-ជ្រុង-អារ ចម្រុះប្រភេទ ៩.២៨៦,៩២២ម៉ែត្រត្រីគុណ សសរ ២.៤៧៧ដើម កូនឈើ ៣.៣៨១ដើម អុស ២១៦ស្ទែរ ធ្យូង ៦,៧តោន ផ្ដៅ ១៦២០គ.ក្រ ម្រះព្រៅ ៤៣៦៣ គ.ក្រ ផ្លែសំរ៉ង ២១.៥៧១គ.ក្រ សាច់សត្វចំរុះ ៣.៣២០ក្បាល និង ៦.៦៧៣គ.ក្រ សំណាកសត្វព្រៃ ២២មុខ និង១៦០ គ.ក្រ រថយន្ដ ៦៧១គ្រឿង ខុនថែននឺ ០៥ទូ គោយន្ដ ៦២ គ្រឿង ត្រាក់ទ័រ ១០ គ្រឿង អេស្កាវ៉ាទ័រ ០៣គ្រឿង ប៊ុលឌឺសែរ ០៣គ្រឿង រទេះគោ ១១ គ្រឿង រទេះកង់ឡាន ៣៥ គ្រឿង រទេះសណ្ដោង ១៥ គ្រឿង រណារយន្ដ ១៥ គ្រឿង ទូក ៥៧ គ្រឿង ឡូរី ០៧ គ្រឿង ម៉ូតូ ១០១ គ្រឿង តុឈូសឈើ ២២ គ្រឿង កំទេចឡធ្យូង ៣៣ឡ ។
រដ្ឋបាលព្រៃឈើក៏បានស្រង់ស្ថិតិដីព្រៃឈើដែលត្រូវបានរំលោភបំពាន ចំនួន ៧.៩៧៧ ហិកតា ធ្វើការដកហូតដោយ ពុំបានចេញដីកា ចំនួន ១២.៦២៣ ហិកតា ចេញដីកាបដិសេធដកហូតដីព្រៃឈើមកវិញ មានចំនួន ១ដីកា ស្មើនឹង ៩.៣១៧ ហិកតា ស្រង់ស្ថិតិរណារយន្ដ បានចំនួន ៤៥ គ្រឿង និង ដកហូតបាន ចំនួន ៣៩៤ គ្រឿង ៕
ដោយ : សិរី
No comments:
Post a Comment