សៀមរាប ៖ ប្រជាពលរដ្ឋនាំគ្នាទៅជីកដំឡូង នៅក្នុងព្រៃក្បែរភូមិប្រទះឃើញគ្រាប់ ៦០.មម ដែលត្រូវបានលាក់ទុកក្រោមដើមឈើ ចំងាយពីភូមិប្រមាណ ៤គីឡូម៉ែត្រ ស្ថិតនៅក្នុងភូមិ រវៀង ឃុំខ្វាវ ស្រុកជីក្រែង ខេត្តសៀមរាប ។
ហេតុការណ៍ដែលប្រទះឃើញគ្រាប់ ៦០ ម.មនេះ បានកើតឡើងកាលពីថ្ងៃទី២០ ខែមករា ឆ្នាំ ២០១១ វេលាម៉ោង ៩.៣០ នាទី ព្រឹក ស្ថិតនៅចំណុចទីតាំងក្នុងព្រៃ ក្នុងភូមិ ឃុំខាងលើ ដោយសារមានប្រជាពលរដ្ឋមួយក្រុមមានគ្នា ៥ទៅ ៦នាក់ នាំគ្នាចូលព្រៃ ដើម្បីជីកដំឡូង ក៏បានឃើញគ្រាប់ចំនួនប្រាំគ្រាប់ដែលមានលក្ខណៈនៅល្អ នឹងអាចប្រើការបាន បន្ទាប់មកក៏បានរាយការណ៍ជូនសមត្ថកិច្ច ប៉ូលិសដើម្បីចាត់វិធានការការពារ និងថែរក្សាគ្រាប់ទាំងនេះ ។
លោក អនុសេនីយ៍ត្រី ឌី សុធា ទទួលបន្ទុកផ្នែកព្រហ្មទណ្ទ ប្រចាំការនៅប៉ុស្តិ៍រដ្ឋបាល ឃុំខ្វាវ បានអោយដឹងថា ក្រោយពីទទួលបានសេចក្តីរាយការណ៍ថា ប្រជាពលរដ្ឋបានប្រទះឃើញគ្រាប់មិនទាន់ផ្ទុះនៅចំណុចទីតាំងខាងលើ លោកបានដឹកនាំកំលាំងចុះទៅពិនិត្យឃើញថាជាគ្រាប់ ៦០ ម.ម ដែលមានគេយកមកលាក់ទុក និងពុំទាន់ខូចអ្វីឡើយ ជំហានដំបូងលោកត្រូវតែកាប់សម្រាស់ដាក់គ្របពីលើ និងធ្វើស្លាកសញ្ញាសំគាល់ ដើម្បីជាសុវត្ថិភាពរបស់បងប្អូន កុំអោយចូលទៅទីតាំងខាងលើ។ ចំណែកគ្រាប់៦០ម.មនេះ លោកនឹងរាយការណ៍អោយសមត្ថកិច្ចជំនាញ ដើម្បីមកទទួល និងសូមអំពាវនាវដល់បងប្អូនប្រជាពលរដ្ឋ កុំប៉ះពាល់គ្រាប់រំសេវ ឬអាវុធជាតិផ្ទុះទាំងឡាយដែលជួបប្រទះតាមព្រៃអោយសោះ និងរាយការណ៍ជូនសមត្ថកិច្ច។
លោក រៀម រិទ្ធី រស់នៅភូមិឃុំខាងលើ បានរៀបរាប់ប្រាប់កម្ពុជាថ្មីថា នៅក្នុងឃុំខ្វាវ ទឹកដីស្រុកជីក្រែងនេះ កាលពីសម័យសង្គ្រាម តំបន់នេះជាតំបន់សមរភូមិក្តៅគគុក និងជាកន្លែងដែលប៉ុលពតកាន់កាប់នៅតំបន់នេះ បើតាមការបាន់ស្មានគ្រាប់ដែលយកមកលាក់ទុកនៅទីនេះ គឺជាគ្រាប់ដែលបានយកលាក់នៅឆ្នាំ ១៩៩៤ ព្រោះគ្រាប់នៅសភាពល្អទាំងអស់ រហូតមកដល់ពេលនេះបើនៅតាមរបង និងនៅជាយភូមិ ប្រទះឃើញគ្រាប់ជាច្រើននៅរាយប៉ាយក្នុងដីរបស់ប្រជាពលរដ្ឋ គ្រាប់ខ្លះពុំមាននរណាហ៊ានប៉ះពាល់នោះទេ ពេលគេជួបប្រទះបានត្រឹមតែកាប់សម្រាស់ដាក់គ្របពីលើតែប៉ុណ្ណោះ ហើយពុំទាន់មានសមត្ថកិច្ចជំនាញ ចុះមកដោះមីននៅឡើយដែរ។
ប្រជាពលរដ្ឋដែលរស់នៅក្នុងឃុំខ្វាវ បានសំណូមពរអោយអង្គការស៊ីម៉ាក់ ជួយជំរុញការដោះមីននៅក្នុងឃុំខ្វាវផង ដោយសារតែកន្លងមកបានជួបប្រទះគ្រាប់រំសេវជាច្រើនដែលនៅក្នុងដី និងព្រៃ អាចមានអន្តរាយដល់កូនៗ និងប្រជាពលរដ្ឋ ជាពិសេសនៅពេលរដូវភ្លើងឆេះព្រៃ អាចមើលឃើញតាមព្រៃតែម្តង ។
ប៊ុន រដ្ឋា
No comments:
Post a Comment