ព្រះវិហារ: សេចក្តីរាយការណ៍ពីព្រំដែនបានអះអាងថាទាហានសៀមប្រដាប់ដោយអាវុធដែលមានគ្នាប្រមាណ១០០នាក់បានចូលមកកាន់ប្រាសាទតាមាន់កាលពីយប់មិញនេះ។ដោយឡែកស្ថានភាពនៅតាមបណ្តោយព្រំដែនក្នុងតំបន់ប្រាសាទព្រះវិហារបានចាប់ផ្តើមតានតឹងជាថ្មីបន្ទាប់ពីសៀមបានបញ្ជូនកំលាំងបន្ថែមមកកាន់តំបន់ព្រំដែននិងទាមទារឲ្យកម្ពុជាទំលាក់ទង់ជាតិដែលដាក់នៅវត្តកែវសិក្ខាគីរីស្វារៈ។
ប្រភពបាននិយាយម៉ោង១០ព្រឹកថ្ងៃទី២៨ខែមករានេះថា កងទព័កម្ពុជាកំពុងស្ថិតនៅក្នុងសភាពប្រុងជើងការណ៍នៅប្រាសាទតាមាន់ ប្រាសាទតាក្របី នៃខេត្តឧត្តរមានជ័យ បន្ទាន់ពីទាហានសៀមបានបន្ថែមកំលាំងមកកាន់តំបន់នោះ។ ប្រភពបន្តទៀតថា យប់ថ្ងៃទី២៧ខែមករាក្នុងរង្វង់ម៉ោង៧-៨ ទាហានសៀមប្រដាប់ដោយអាវុធប្រមាណ១០០ នាក់បានចូលមកកាន់បរិវេណប្រាសាទតាមាន់។ ទាហានទាំងនេះបាននៅទីនោះប្រមាណជិត២ម៉ោងទើបចាកចេញទៅវិញបន្ទាប់ភាគីកម្ពុជា ព្យាយាមជំរុញឲ្យដកចេញពីព្រោះសកម្មភាពនេះខុសពីអ្វីដែលបានព្រមព្រៀងគ្នារួចទៅហើយ។
ដោយឡែកស្ថានភាពនៅតំបន់ប្រាសាទព្រះវិហារក៏មានសភាពតានតឹងជាថ្មីដែរ បន្ទាប់ពីទាហានសៀមបានព្យាយាមឲ្យកម្ពុជាដាក់ទង់ជាតិដែលដាក់នៅវត្តកែវសិក្ខាគីរីស្វារៈ ដែលជាវត្តរបស់ខែ្មរចុះ ហើយភាគីកម្ពុជាមិនព្រម។ ប្រភពបន្តទៀតថា រហូត មកដល់ពេលនេះមិនទាន់មានការផ្ទុះអាវុធអ្វីទេ តែកងទ័ពទាំងពីបានស្ថិតក្នុងស្ថានភាពប្រុងជើងការណ៍ និងប្រឈមដាក់គ្នា។ ខាងសៀមបានបញ្ជូនទាហាន និងយុទ្ធោបករណ៍ប្រយុទ្ធជាច្រើនមកកាន់តំបន់ដែលធ្លាប់មានបញ្ហាកន្លងមក។
ដោយ : សេរី
No comments:
Post a Comment