Monday, December 20, 2010

សម្ដេចតេជោ​ជម្រុញឲ្យ​​អនុវត្ដ​គ្រប់យន្ដការ​​ដែលមានស្រាប់ដើម្បី​​ធ្វើ​ឲ្យ​ទំនាក់​ទំនង​កម្ពុជា​-ថៃ​បាន​ល្អប្រសើរ(២០/១២/២០១០)


សម្ដេចអគ្គមហាសេនាបតីតេជោ ហ៊ុន សែន បាន​ទទួល​ជួប​ធ្វើ​សវនាការ​ជាមួយ​ឯកឧត្តមកាស៊ីត ភីរម្យ ​រដ្ឋមន្ដ្រី​ក្រសួង​​ការបរទេសថៃ ​នា​ថ្ងៃទី ២០ ខែ​ធ្នូ ឆ្នាំ​២០១០ នៅវិមានសន្ដិភាព ក្នុងរាជធានីភ្នំពេញ។​
  ឯកឧត្តម អ៊ាង សុផល្លែត ជំនួយការសម្ដេចតេជោ ហ៊ុន សែន បាន​ឲ្យ​ដឹង​ថា ​នៅ​ក្នុង ​ជំនួប​នោះ​ សម្ដេចតេជោបានលើកយកនូវសុភាសិតបុរាណខ្មែរមួយ​ឃ្លា​ប្រាប់ ឯកឧត្តម​កាស៊ីត ភីរម្យ ដោយ​​ប្រៀប​ធៀប​ទៅនឹង​​សភាពការណ៍ព្រំដែនកម្ពុជា-ថៃ ដែល​​បានវិល ត្រឡប់ទៅរកស្ថាន​ភាព​មុនថ្ងៃទី ១៥ ខែកក្កដា ឆ្នាំ ២០០៨ នោះថា  “ក្រោយពេលភ្លៀង មេឃស្រឡះ” ។

សម្ដេចតេជោ​នាយ​ករដ្ឋមន្ត្រី​ មានប្រសាសន៍ថា ​ឥឡូវ​នេះ​ជា​ពេល​វេលា​សមស្រប​ និង​ ត្រឹម​ត្រូវ​ ដែល​ប្រទេស​ទាំង​ពីរ​ត្រូវ​ជម្រុញ​ការ​អនុវត្ត​គ្រប់​យន្តការ​ទាំង​អស់​ដោយ​ធ្វើការ​ សហការ​រួម​គ្នា​ ដើម្បី​ឲ្យ​ទំនាក់​ទំនង​​កម្ពុជា​-ថៃ​ កាន់តែ​បាន​ប្រសើរឡើង​។ សម្តេច​តេជោ​ បាន​បញ្ជាក់​ថា ​​អ្វីៗដែលបានរៀប​ចំ​ឡើង​គឺ​មាន​ទិសដៅ ដើម្បីជម្រុញ​កិច្ច សហប្រតិបត្ដិការ​ រវាង​ប្រទេស​យើង​ទាំងពីរ។

          ឯកឧត្តម​ជំនួយការ​បាន​​មាន​ប្រសាសន៍​ថា ​ក្នុង​ឱកាស​នោះ​ឯកឧត្ត​ម​ កាស៊ីត ភីរម្យរដ្ឋមន្ត្រី​ក្រសួង​ការ​​បរទេស​ថៃ​ បាន​រាយការណ៍​ជូន​សម្តេច​តេជោ​អំពីលទ្ធផលនៃជំនួបរបស់ លោកជាមួយឯកឧត្ដម ហោ ណាំហុង ​ឧបនាយក​រដ្ឋ​មន្ត្រី​ រដ្ឋ​មន្រ្តី​ក្រសួង​ការបរទេស​ និង​សហប្រតិបត្តិការ​អន្តរជាតិ​ ដោយ​បាន​គូស​បញ្ជាក់​ថា ភាគី​ទាំង​ពីរ​បាន​ពិនិត្យ មើល ទំនាក់ទំនងរវាងប្រទេសទាំងពីរ ហើយបន្ទាប់ពីជំនួប ចំនួន ៤ ដង​រវាង​​នាយករដ្ឋ​មន្ដ្រី​កម្ពុជា-ថៃ​នោះ សកម្មភាពជាច្រើនត្រូវបានកើតមានឡើង ដូចជាការសំដែងសិល្បះ ជំនួប​​រវាង​ អ្នក​យក​ព័ត៌មាន​ បញ្ហាបច្ចេកទេស វប្បធម៌ និង បញ្ហាព្រំដែនជាដើម ដែល​សកម្មភាព​ទាំង​នេះ​ សុទ្ធ​សឹង​តែជា កត្ដា​ជម្រុញ​ឱ្យមានកិច្ចសហប្រតិបត្ដិការកាន់តែល្អប្រសើរឡើងរវាងប្រទេស ទាំងពីរនោះ ។ ឯកឧត្តម​ កាស៊ីត បាន​ថ្លែង​អំណរ គុណចំពោះសម្ដេចតេជោ ដែលបាន គាំទ្រនូវរាល់សកម្មភាព ទាំងនេះ ។

ឯកឧត្តម កាស៊ីត ភីរម្យ មានជម្រាបជូនសម្ដេច ហ៊ុន សែន ថាជំហរបស់​ រាជរដ្ឋាភិបាល ​ថៃ​នៅ​ពេល​​នេះគឺធ្វើយ៉ាងណាបោះជំហានទៅមុខដើម្បីពង្រីក និង ពង្រឹង​កិច្ចសហប្រតិ បត្ដិការ​ រវាង​ប្រទេស​ទាំងពីរ ដើម្បីជាផលប្រយោជន៍របស់ ប្រជាជនប្រទេសទាំងពីរ ហើយរាល់សកម្មភាព​ទាំងឡាយ​ ដែល​ភាគី​ថៃ​បានធ្វើនឹងរាយការណ៍ជូនកម្ពុជាតាមរយៈ ស្ថានទូតកម្ពុជានៅក្នុងប្រទេសថៃ និង តាមរយៈ​ស្ថានទូត​ថៃ​ប្រចាំនៅក្នុងព្រះរាជាណាចក្រ កម្ពុជាផងដែរ ។

នៅក្នុងជំនួបនោះឯកឧត្តម​ កាស៊ីត ភីរម្យ ក៏បាននាំមកនូវការផ្ដាំផ្ញើសាកសួរសុខទុក ពីសំណាក់​ឯកឧត្តម​នាយករដ្ឋមន្ដ្រី​ថៃ ជូនចំពោះសម្ដេចតេជោ​នាយករដ្ឋមន្ដ្រី។ ចំណែក​ សម្ដេចតេជោ​ក៏បាន​ផ្ដាំផ្ញើ​ការ​សាកសួរ​សុខទុក្ខត្រឡប់ទៅ វិញជូនឯកឧត្តម​នាយករដ្ឋមន្ដ្រី ថៃវិញ ព្រមទាំង​បានថ្លែង​អំណរគុណ​ចំពោះ​រាជរដ្ឋាភិបាល​ថៃដែលបានផ្ញើលិខិតចូលរួម មរណទុក្ខ និង បានជួយឧបត្ថម្ភជា​ជា​ថវិកា​ជួយ​ដល់​ជន​រង​គ្រោះ​​ដោយ​ឧបទ្ទវហេតុនៅស្ពាន កោះពេជ្រកាលពីរាត្រីថ្ងៃទី ២២ វិច្ឆិកានោះផងដែរ​ ។

ឯកឧត្តម​ កាស៊ីត ភីរម្យ បានមកដល់កម្ពុជាកាលពីថ្ងៃទី ១៩ ធ្នូ ដើម្បី​ចូលរួម​ក្នុង​ពិធី​ ប្រារឰ​ខួប​អនុស្សាវរីយ៍​លើកទី ៦០ នៃទំនាក់ទំនងការទូតកម្ពុជា-ថៃនៅ​ស្ថានទូត​ថៃ​​ប្រចាំ​ ព្រះរាជាណាចក្រកម្ពុជា​ ហើយ​លោក​បានជួប​ពិភាក្សា​ការងារ​ទ្វេភាគី​ជា​មួយ​ឯកឧត្ដម ឧបនាយករដ្ឋមន្ដ្រី ហោ ណាំហុង រដ្ឋមន្ដ្រី​ក្រសួង​ការបរទេស និង សហប្រតិបត្ដិការ ​អន្ដរ​ជាតិ​នៅ​ព្រឹកថ្ងៃ​ទី​​ ២០ ខែធ្នូ ឆ្នាំ​២០១០ មុនពេល​ដែល​​ចូលមកជួបសំដែងការគួរ សមជា មួយ​សម្ដេចតេជោ​នាយករដ្ឋមន្ដ្រី​នៅ​វិមាន​សន្តិភាព​ ។

No comments:

Post a Comment