រាជធានីភ្នំពេញ ៖ សហព័ន្ធពិភពលោកនៃសមាគមការ៉ាតេជប៉ុនបានសំរេចប្រគល់វិញ្ញាបនបត្រទទួលស្គាល់សាលាការ៉ាតេដូ ប៊ូដូកម្ពុជាឱ្យក្លាយជាសមាជិករបស់ខ្លួនកាលពីថ្ងៃទី២៦ ធ្នូ ។ ពិធីប្រគល់វិញ្ញាបនបត្ររៀបចំធ្វើឡើងនៅសាលាការ៉ាតេដូ ប៊ូដូកម្ពុជានៅទួលគោក ក្រោមអធិបតីភាពលោកអូន ព័ន្ធមុនីរ័ត្ន រដ្ឋមន្ត្រី ប្រតិភូអមនាយករដ្ឋមន្ត្រី ។ លោកអូន ព័ន្ធមុនីរ័ត្ន បានថ្លែងថា សាលាការ៉ាតេដូ ប៊ូដូកម្ពុជា គឺជាសាលាការ៉ាតេដូ មួយដ៏មានសារសំខាន់បំផុតនៅក្នុងប្រទេសកម្ពុជាដែលបានបង្កើតឡើងកាលពីឆ្នាំ១៩៨៩ ។ បន្ទាប់ពីមានការទទួលស្គាល់ដោយសហព័ន្ធពិភពលោកនៃសមាគមការ៉ាតេជប៉ុននាពេលនេះលោកសង្ឃឹមថា សាលានេះកាន់តែមានសក្តានុពលខ្លាំងក្លានៅថ្ងៃអនាគតដែលអាចជំរុញឱ្យមានការអភិវឌ្ឍយ៉ាងឆាប់រហ័ស តាមរយៈដៃគូ ជាពិសេសគឺអភិវឌ្ឍធនធានមនុស្សនេះតែម្តង ។
លោកអូន ព័ន្ធមុនីរ័ត្ន បញ្ជាក់ថា ការអភិវឌ្ឍធនធានមនុស្សគឺទាមទារឱ្យមានការដើរទន្ទឹមគ្នាលើបី វិស័យទើបមនុស្សនោះក្លាយជាធនធានពិតៗ គឺទីមួយត្រូវអភិវឌ្ឍផ្នែកបញ្ញាស្មារតីដែលផ្សារភ្ជាប់ទៅនឹងការអប់រំផ្តល់បទពិសោធន៍ និងចំណេះដឹងថ្មីៗបន្ថែមទៀត ទី២ ត្រូវអភិវឌ្ឍឱ្យមានកាយសម្បទាមាំមួនដើម្បីទទួលបានផាសុកភាពខ្លាំងក្លា និងទី៣ ត្រូវអភិវឌ្ឍផ្នែកសីលធម៌ សុជីវធម៌ ឱ្យបានល្អត្រឹមត្រូវពីព្រោះសីលធម៌ សុជីវធម៌ជួយឱ្យមនុស្សមានវិន័យល្អ មនុស្សមានវិន័យល្អទើបសំរេចកិច្ចការបានជោគជ័យ ។ សាលាការ៉ាតេដូ ប៊ូដូកម្ពុជាមានក្លឹបជាសមាជិកចំនួន១៦ក្លឹបជាសមាជិកដែលសរុបកីឡាករ កីឡាការិនីទាំងអស់ជាង៧០០នាក់ តែកីឡាករ កីឡាការិនី ដែលចូលរួមនៅក្នុងឱកាសនោះមានតែជាង២០០នាក់ប៉ុណ្ណោះ ៕
ដោយ ៖ កោះឯករាជ្យ
No comments:
Post a Comment