Monday, December 27, 2010

ឯកឧត្តមបណ្ឌិតសភាចារ្យ សុខ អាន ដឹក​នាំ​កា​រ​ប្រជុំ​លើក​ទី​៦ នៃ​​គណៈកម្មាធិការជាតិ​បណ្តុះបណ្តាល


នារសៀលថ្ងៃទី​២៧ ខែ ធ្នូ ឆ្នាំ​ ២០១០ នៅទីស្តីការ​គណៈរដ្ឋមន្រ្តី​មាន​បើកកិច្ច​ប្រជុំ​លើកទី​៦ នៃ​គណៈ កម្មាធិការជាតិ​បណ្តុះបណ្តាល​ក្រោម​អធិបតី​ភាព​ដ៏ខ្ពង់​ខ្ពស់​របស់​​ឯកឧត្តម​បណ្ឌិតសភាចារ្យសុខ អានឧបនាយករដ្ឋមន្រ្តី រដ្ឋមន្រ្តីទទួល​បន្ទុក​ទីស្តីការ​គណៈរដ្ឋមន្រ្តី​​​​​ និង​ជា​ ប្រធាន​គណៈ​កម្មាធិការ​ជាតិ បណ្តុះ​បណ្តាល​​ ដើម្បី​ធ្វើការ​ត្រួត​ពិនិត្យ​វាយតម្លៃ​ការងារ​ដែល​ សម្រេច​បាន​ និង​លើក​ទិសដៅ​សម្រាប់​ ពេល​ខាង​មុខ​។

តាមរយៈកិច្ចខិតខំប្រឹងប្រែងនាពេលកន្លងមក ជាពិសេសក្រោមការគាំទ្រ និងចង្អុលបង្ហាញដ៏ ខ្ពង់​ខ្ពស់ របស់ស ម្តេចអគ្គមហាសេនាបតីតេជោ​ ហ៊ុន សែន គណៈកម្មាធិការបណ្តុះបណ្តាល សម្រេចនូវ សមិទ្ធផលគួរជា ទីមោទនៈជាអាទិ៍ ក្នុង​រយៈ​ពេល​៥ឆ្នាំ​កន្លង​មក​ (២០០៥-២០១០) គណៈកម្មាធិការ ជាតិ​បាន​​ធ្វើ​ការ​បណ្តុះ​បណ្តាល​​វិជ្ជាជីវៈ​ជំនាញ​ផ្សេង​ រួម​មាន​ ផ្នែក​កសិកម្ម ឧស្សាហកម្ម​ និង​ បច្ចេកវិទ្យា​ ​​​ជូន​ប្រជាពលរដ្ឋ​​នៅ​តាម​ឃុំ​ចំនួន​ ២១០ឃុំ​ ដែល​ក្រីក្រ​ជាង​គេ ក្នុង​ ចំណោម​ខេត្ត​ចំនួន​ ៧ ដោយ​មាន ​សិក្ខាកាម​ចូលរួម​​ចំនួន​ ១៦១.៣៨៩​ នាក់ ក្នុង​នោះ​មាន​ស្រ្តី​ ៥៨,០៧%​ ​ លើ​គម្រោង​បណ្តុះបណ្តាល​ ១២០.០០០ នាក់។​ ​ ​អ្នក​ដែល​ទទួល​បាន​ការ ​បណ្តុះ​ បណ្តាល​មាន​ការងារ​ធ្វើ​ប្រមាណ​​ពី​ ៦៥% ទៅ ៧២%​ ​​ ​ ធ្វើ​ឲ្យ​ចំណូល​កើន​ឡើង​ពី​ ៩៥.៨៥០ រៀល​(ប្រមាណ​ ២៤,៧ ដុល្លារ​) ដល់​ជិត​ ២០ ម៉ឺន​រៀល (ប្រមាណ​ ៤៩ ដុល្លារអាមេរិក​) គឺ​កើន​ស្មើ​នឹង​ ៩៨% លើ​ចំណូល​មូលដ្ឋាន​ក្នុង​រយៈ​ពេល ​៦ខែ​ ក្រោយ​ការ​បណ្តុះបណ្តាល។​

ដើម្បី​ឆ្លើយតបទៅនឹងតម្រូវ​ការ​ទីផ្សារ ដែលកំពុងទាមទារឲ្យមានកំលាំងពលកម្មជំនាញខាង​​ វិស័យ​កសិកម្ម ឧស្សាហកម្ម និង​សេវាកម្ម​​ ​នៅ​រាជធានីភ្នំពេញ​ ​សៀម​រាប និងព្រះសីហនុ ដែល ​ជា​ប៉ូល​ ទេសចរណ៍​របស់​ជាតិ​​​ ព្រម​​ទាំង​ខេត្ត​មួយ​ចំនួន​ទៀត​ ដូច​ជា ស្វាយរៀង​ កោះកុង​ កំពង់​ ចាម តាកែវ​ ដែល​ ជា​តំបន់​សេដ្ឋកិច្ច​ពិសេស​​ កាល​ពី​ថ្ងៃទី​២៧ ខែ​មេសា ឆ្នំា​២០១០ នៅក្នុង ​វេទិកា​រាជរដ្ឋាភិបាល​-ផ្នែក​ ឯកជន​លើកទី​១៥​ ​សម្តេច​អគ្គមហា​សេនា​បតីតេជោ ហ៊ុន សែន ​បាន​អនុញ្ញាត​ឲ្យ​ គណៈកម្មាធិការ ជាតិ​បណ្តុះ​បណ្តាល​ ធ្វើការ​សម្រប​សម្រួល​បង្កើត​ផែនការ​ និង​អាហារូបករណ៍​ថ្មី​សម្រាប់​​ធ្វើការ​​ បណ្តុះ បណ្តាល​បច្ចេកទេស​ និង​វិជ្ជាជីវៈ​ ដល់​កម្មករ កម្មការនី​ ដើម្បី​ផ្តល់ឱកាសកាន់តែទូលាយ ក្នុង​ការទទួល បាននូវការ​ងារ​ និងប្រាក់ ចំណូល។​

លើសពីនេះ ដោយ​មាន​ការ​គាំទ្រ​ពី​ធនាគារ​អភិវឌ្ឍន៍​អាស៊ី និង​រាជរដ្ឋាភិបាល​​គណៈ​កម្មាធិការ ជាតិ​ បណ្តុះ​បណ្តាល​ បាន​ទទួល​ថវិកា​ចំនួន​ ២៧,៥២ លានដុល្លារ​អាមេរិក​​ ក្នុងនោះរួមមាន ទឹកប្រាក់ជំនួយ ​ឥត​សំណង​របស់ADB ចំនួន​ ២៤លានដុល្លារ និងថវិកាបដិភាគរបស់ រាជ រដ្ឋាភិបាល សម្រាប់​រយៈពេល​ ៥ ឆ្នាំ​ (២០១០-២០១៥​) លើគម្រោង​ពង្រឹង​វិស័យ​អប់រំ បណ្តុះ​ បណ្តាល​បច្ចេកទេស​ និង​វិជ្ជាជីវៈ​(STVET) ​សម្រាប់​អនុវត្ត​ លើ​២៣​ខេត្ត និង​រាជធានី​។​ កន្លង​មក​គណៈកម្មាធិការ​ជាតិ​បណ្តុះបណ្តាល​ ក៏ទទួលបាន​កញ្ចប់​ថវិកា​ ២,៣២ លាន​ដុល្លារអាមេរិក សម្រាប់​គម្រោង​សាកល្បង​លើ​បច្ចេក​ទេស​ ​ក្រោយ​​ប្រមូលផល និង​កម្ម​វិធី​ស្ពានចម្លង​បន្តជំនាញ​ចាប់​ពី​ឆ្នំា​២០០៩ ដល់​ ឆ្នាំ​២០១២ ហើយ​ជា​ លទ្ធផល​​បណ្តុះបណ្តាល​បាន​ ៩៣៩​ នាក់​ លើ​ផែនការ​ ៣.០០០ នាក់​ សម្រាប់​បច្ចេកទេស ​ក្រោយ ​ប្រមូលផល​​ និង​បណ្តុះ​បណ្តាល​បាន​ ៣៩៩ នាក់​ លើ​គម្រោង ៧០០ នាក់​ សម្រាប់​កម្មវិធីស្ពាន ​ចម្លង​ បន្ត​ជំនាញ​​។​

អង្គ​ប្រជុំ​នៃ​គណៈ​កម្មាធិ​ការជាតិបណ្តុះបណ្តាល​ ក៏បាន​ធ្វើ​ការ​ពិនិត្យ​ផង​ដែរ​ទៅ​លើ​​របាយការណ៍​ លទ្ធផល​ការងារ​របស់​ទី​ភ្នាក់​ងារជាតិមុខរបរ​ និង​ការងារ​ របាយការណ៍​វាយតម្លៃ​ ស្ថានភាព​អប់រំ​ បណ្តុះ​ បណ្តាល​បច្ចេកទេស​ និង​វិជ្ជាជីវៈ និង​លើក​ទិស​ដៅ​កែលំអរ គុណភាព​ ដើម្បី​ឆ្លើយ​តប​តាម​តម្រូវ​ការ ​ទីផ្សារការងារ​ ផែនការ​បណ្តុះបណ្តាល​កម្មករ កម្មការនី​ ក្រោម​គម្រោង​មូលនិធិពិសេស​ របស់​សម្តេច​ តេជោ​​នាយករដ្ឋមន្រ្តី​ សេចក្តី​រាយការណ៍​អំពី​លទ្ធផល​នៃ​ការ​សាង​សង់​វិទ្យាស្ថាន​ ពហុបច្ចេកទេស ​សម្តេច​តេជោ ហ៊ុន សែន ភូមិភាគតាកែវ​ និង​សេចក្តី​ព្រាង​សារាចរ​ណែនាំ​របស់​ រាជរដ្ឋាភិបាល ​ស្តីពី​ការ​លើក​កំពស់​គុណភាព​ និងប្រសិទ្ធភាព​ នៃ​ការ​អប់រំ​បណ្តុះបណ្តាល​បច្ចេកទេស​​ និង​វិជ្ជាជីវៈ​។ ឯកឧត្តម ពេជ្រ សោភ័ន រដ្ឋលេខាធិការ​ក្រសួង​ការងារ និង​បណ្តុះបណ្តាល​វិជ្ជាជីវៈ​​ មាន​ប្រសាសន៍​ ឲ្យដឹងផងដែរ​​ថា គោលបំណង​នៃ​សារាចរ​ គឺជម្រុញ​​ឲ្យ​បង្កើន​សមត្ថភាព​កម្មករ​ កម្មការនី​ឲ្យ​កាន់​ តែ​ប្រសើ​​រឡើង​ទាំង​ចំណេះ​ដឹង​ ជំនាញ​ ឥរិយាបថ និង​សីលធម៌វិជ្ជាជីវៈ​។


ក្នុងឱកាសនេះដែរ អង្គប្រជុំបានពិភាក្សាផងដែរទៅលើគម្រោងនៃការកំណត់​ក្របខ័ណ្ឌ គុណវុឌ្ឍិ​ ជាតិសម្រាប់វិស័យ បណ្តុះបណ្តាលបច្ចេកទេស និងវិជ្ជាជីវៈដោយគ្រោងនឹងកំណត់កំរិកទាំង៨ សម្រាប់​ វិស័យនេះ​ ពោលគឺពីកំរិតវិញ្ញា បនប័ត្រវិជ្ជាជីវៈកំរិតមូលដ្ឋានដល់កំរិតបណ្ឌិត។

មាន​ប្រសាសន៍​ក្នុង​ឱ​កាស​នោះ​ឯកឧត្តមបណ្ឌិត សុខ អាន ​បាន​ណែនាំ​ឲ្យ​ជម្រុញ​ការ​ បណ្តុះ​បណ្តាល ​​បន្ថែម​អំពី​ការ​កែ​ច្នៃ​ និង​វេច​ខ្ចប់​ផលិតផល​កសិកម្ម​ ដែល​ផលិតបាន​ជូន​ប្រជាពលរដ្ឋ​ ដែល​មាន​កំលាំង​ ៦០% កំពុង​បំរើការងារ​លើ​វិស័យ​កសិកម្ម​។ ទីភ្នាក់​ងារ​ជាតិមុខរបរ និង​ការងារ​ត្រូវ​បង្កើន​ ទំនាក់​ទំនង ​ជាមួយ​ស្ថាប័ន​រដ្ឋនានា​​ ជាពិសេស​ក្រុមប្រឹក្សា​អភិវឌ្ឍន៍​កម្ពុជា​ និង​ផ្នែក​ឯកជន​ ដើម្បី​ប្រមូល​ និង​ផ្តល់​ ព័ត៌មាន​តាម​បណ្តាញ​ឃោសនានានា​អំពី​តម្រូវការ​នៃ​ទី​ផ្សារ​ការងារ​ និង​​អំពី​​មន្ត្រី​ជំនាញ​ និង​កំលាំង​ ពលកម្ម​ជំនាញ​​ដែល​មាន ធ្វើ​យ៉ាង​ណា​ឲ្យ​​ទីភ្នាក់​ងារ​ជាតិមុខរបរ និង​ការងារ​ ក្លាយ​ជា​មជ្ឈមណ្ឌល ​មួយ​សម្រាប់​ប្រឹក្សា​ និង​ស្វែង​រកការងារ​ជូន​ប្រជាពលរដ្ឋ​។​

ឯកឧត្តមបណ្ឌិត សុខ អាន ឧបនាយករដ្ឋមន្រ្តី​បាន​ចាត់​ទុក​គម្រោង​ពង្រឹង​វិស័យ​បណ្តុះបណ្តាល​ បច្ចេកទេស​ និង​វិជ្ជាជីវៈ​(STVET) ជាការងារ​គន្លឹះមួយ​​សម្រាប់​ជម្រុញ​ការងារ​​អភិវឌ្ឍន៍សេដ្ឋកិច្ច​ជាតិ​​ ដែល​ទាម​ទារ​ឲ្យ​មាន​ការ​សហការ​គ្នា​អនុវត្ត​ឲ្យ​បាន​ល្អ​។

No comments:

Post a Comment