Tuesday, December 21, 2010

គោលការណ៍​កម្ពុជា​ជាមួយ​ថៃ​គឺ​បញ្ជៀស​ការ​ប៉ះ​ទង្គិច​​គ្នា​ដោយ​​អាវុធ(២០/១២/២០១០)


នៅក្នុងកិច្ច​​ចូល​ជួប​សម្តែង​ការ​គួរសម​ជាមួយសម្ដេចអគ្គមហាសេនាបតីតេជោ ហ៊ុន សែននាយក រដ្ឋមន្ដ្រី នៃ​ព្រះរាជាណាចក្រ​កម្ពុជា នា​ថ្ងៃទី ២០ ខែ​ធ្នូ ឆ្នាំ​២០១០ នៅវិមាន​សន្ដិភាព ​​ក្នុង​រាជធានី​ភ្នំពេញ ឯកឧត្តម​​ ឧត្តម​សេនីយ៍ ប្រាយុទ្ធ​ ចាន់អូចា​ (PRAYUTH CHAN OCHA) អគ្គមេបញ្ជាការ​កងទ័ព​ជើង​គោកថៃ​បានអះអាង​ប្ដេជ្ញា​នៅ​ចំពោះ​មុខ​​សម្ដេចតេជោថា នឹង​មិន​ បណ្ដោយ​ឱ្យ​ក្រុម​ណា​មួយ ប្រើ​ប្រាស់​​ទឹកដីថៃ ដើម្បីធ្វើ​សកម្មភាព​មិន​ត្រឹម​ត្រូវ​ចំពោះ ប្រទេស កម្ពុជានោះឡើយ ។

     ឯកឧត្តម​ អ៊ាង សុផល្លែត ជំនួយការសម្ដេចនាយករដ្ឋមន្ដ្រីឱ្យដឹងថា ក្នុង​ជំនួបនោះ​ ឯកឧត្តម​​ ឧត្តម​សេនីយ៍​ PRAYUTH ​បាន​ថ្លែង​ថា ដំណើរទស្សនកិច្ចរបស់​លោក​មកកាន់​ ព្រះរាជាណាចក្រកម្ពុជា​នា​ពេល​នេះ គឺ​ដើម្បី​ទទួលនូវដំបូន្មានពីសម្ដេចតេជោ នាយករដ្ឋមន្ដ្រី ។ នៅ​ក្នុង​ឱកាស​នោះ​ ឯកឧត្តម​​ ឧត្តម​សេនីយ៍ ប្រាយុទ្ធ​ ចាន់អូចា​ ​បាន​ថ្លែង​អំណរគុណ ​ចំពោះសម្ដេចតេជោ ហ៊ុន សែន ដែលនៅក្នុង រយៈពេល ២ ខែ​កន្លងមក​នេះ​បាន​ធ្វើឱ្យ​ ស្ថានការណ៍រវាងកម្ពុជា-ថៃបានធូរស្រាលឡើងវិញ។ ឯកឧត្តម​​ ឧត្តម​សេនីយ៍​អគ្គមេបញ្ជា​ការ ​កង​ទ័ពថៃក៏​បាន​​នាំមក​នូវការសាកសួរសុខទុក្ខពីថ្នាក់ដឹកនាំថៃ និង ពាំ​នាំនូវបំណងល្អ ពី​ សំណាក់​​​ប្រជាជន​ថៃជូនចំពោះសម្ដេចតេជោ ហ៊ុន សែន ក៏ដូចជាប្រជាជន កម្ពុជា ផងដែរ ។

      ឯកឧត្តម​ជំនួយការបានបន្ដថា សម្ដេចតេជោ​នាយករដ្ឋមន្ដ្រីបានថ្លែងអំណរគុណចំពោះ​ ឧត្តមសេនីយ៍​ PRAYUTH ដែល បានពាំ​នាំមកនូវការផ្ដាំផ្ញើសាកសួរសុខទុក្ខជូនចំពោះ រូបសម្តេច​ ក៏ដូច​​​ជា​ការ​​ពាំ​នាំ​នូវបំណងល្អជូនដល់ប្រជាជនកម្ពុជាផង​ដែរ​។ សម្ដេចតេជោ ហ៊ុន សែន មាន​ប្រសាសន៍​ថា នៅ​ពេល​​នេះ​យើង​អាច​និយាយបានថា ស្ថានភាព រវាង ប្រទេស កម្ពុជា-ថៃបានវិល​ត្រឡប់​មក​កាន់​ភាព​ប្រក្រតី​វិញហើយ​ ជាពិសេសនៅ​ពេលដែល ស្ថានភាពជាទូទៅមានសភាពល្អ ហើយទំនាក់ទំនងក៏​មាន​ភាព​ប្រសើរ​ផងដែរ។

 សម្ដេចតេជោ​នាយករដ្ឋមន្ដ្រីបានថ្លែងប្រាប់ឧត្តមសេនីយ៍​ PRAYUTH ថា យុទ្ធ​សាស្ដ្រ​ របស់ កម្ពុជា មាន ៣ គឺទី(១)ប្រែក្លាយតំបន់ប្រយុទ្ធឱ្យទៅជាតំបន់អភិវឌ្ឍ និង ទីផ្សារ ទី(២)​ប្រែក្លាយ​ ព្រំដែន​កម្ពុជា​ និង ព្រំដែន ប្រទេសជិតខាងឱ្យក្លាយទៅជាព្រំដែនប្រកបដោយសន្ដិភាព អភិវឌ្ឍ និង កិច្ច​សហប្រតិបត្ដិការ​​ និង ទី(៣)ជម្រុញការ ចរចាដោយសន្ដិវិធី ដោយមិន ប្រើប្រាស់កម្លាំងឡើយ ។ សម្ដេច​​មានប្រសាសន៍ថា គោល​ការណ៍​​របស់កម្ពុជា ជាមួយថៃគឺ បញ្ជៀសការប៉ះទង្គិចគ្នាដោយអាវុធ ជៀស​វាងការ​ប្រឈម​មុខគ្នា​ខាង​យោធា ខិតខំធ្វើ យ៉ាងណាកុំឱ្យជម្លោះរាលដាលទូទាំងព្រំដែន ដែល​នាំ​ឱ្យ​រាំង​ស្ទះដល់​ កិច្ច​សហប្រតិបត្ដិការ​ រវាងប្រជាជន និងពាណិជ្ជកម្មនៅតាមព្រំដែន ជម្រុញឱ្យមាន​កិច្ច​សហប្រតិបត្ដិការ​ល្អរវាង ទាហ៊ាន និង ទាហ៊ាន​ ប៉ូលីស និងប៉ូលីស ប្រជាជន និងប្រជាជន ហើយ​រវាង​ខេត្ដ ​និងខេត្ដ ផងដែរ ។

ពាក់​ព័ន្ធជាមួយនឹង​ជនជាតិ​ថៃ​ចំនួន ៣ នាក់ដែលត្រូវបានកាត់ទោសដោយតុលាការ​ ខេត្ដ សៀមរាប​នោះ​​សម្ដេច​តេជោ ហ៊ុន សែន មានប្រសាសន៍ថា ពួកគេត្រូវបានដោះលែង ហើយ ហើយ​នៅ​ពេល​នេះ​ពួក​គេ​បាននឹង​កំពុង​តែ​​ធ្វើដំណើរមកកាន់រាជធានីភ្នំពេញ និងស្នាក់​ នៅ​ភ្នំពេញ​ក្នុង​នាម​ជា​អ្នក​ទេសចរណ៍​មិន​មែន​​​​ជា​ឧក្រិដ្ឋជនទៀតនោះ​ទេ។ សម្ដេចតេជោ ក៏ បានប្រគល់​ជនជាតិថៃទាំង ៣ រួបនោះទៅលោក PRAYUTH​​ ​ដើម្បីបាន​ទៅ​ជួប​ជុំក្រុម​ គ្រួសារ​នៅ​ប្រទេស​ថៃវិញ ។

សម្ដេចតេជោ ហ៊ុន សែន មានប្រសាសន៍ថា ឥឡូវនេះអ្វីដែលយើងត្រូវធ្វើ​នោះគឺរួមគ្នា​ ជម្រុញ​ កិច្ច​សហប្រតិបត្ដិការ​ឱ្យបានកាន់តែល្អប្រសើរឡើង និងរួមគ្នាកំចាត់រាល់ឧក្រិដ្ឋ​កម្ម ទាំងឡាយ រួម​ទាំង​ឧក្រិដ្ឋ​កម្ម​ការ​ជួញ​​ដូរ​គ្រឿង​ញៀនផងដែរ ។/

No comments:

Post a Comment