នៅទីស្តីការគណៈរដ្ឋមន្រ្តី នាព្រឹកថ្ងៃទី២៦ ខែវិច្ឆិកា ឆ្នាំ២០១០ ឯកឧត្តមបណ្ឌិតសភាចារ្យសុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី បានទទួលជួបលោកជិនយន់ Jin Yuan ទីប្រឹក្សាអមស្ថានទូតចិនប្រចាំនៅកម្ពុជា ដែលចូលមកជំរាបជូន អំពីការ ផ្តល់ថវិកាចំនួន ៥០ ម៉ឺនដុល្លារអាមេរិករបស់ប្រជាជននិងរដ្ឋាភិបាលនៃសាធារណៈរដ្ឋប្រជា មានិតចិន ជូនចំពោះរាជរដ្ឋាភិបាលកម្ពុជា ដើម្បីប្រើប្រាស់ក្នុងការជួយសង្គ្រោះដល់ ប្រជាពលរដ្ឋកម្ពុជាដែលរងគ្រោះ ដោយឧបទ្ទវហេតុកាលពីរាត្រីថ្ងៃទី២២ ខែវិច្ឆិកា ឆ្នាំ២០១០ នៅមជ្ឈមណ្ឌលកោះពេជ្ររាជធានីភ្នំពេញ។
លោក ជិន យន់ បានមានប្រសាសន៍ជំរាបជូនឯកឧត្តមបណ្ឌិត សុខ អានឧបនាយករដ្ឋមន្រ្តីថា ឯកឧត្តម ហ៊ួ ជិនតាវ ប្រធានាធិបតី និងឯកឧត្តម វ៉េន ជាបាវនាយករដ្ឋមន្រ្តីនៃសាធារណៈរដ្ឋប្រជាមានិតចិនមានសេចក្តីសោកស្តាយ និងចូលរួមរំលែក ទុក្ខជាមួយរាជរដ្ឋាភិបាលកម្ពុជា និងប្រជាជនកម្ពុជា ចំពោះឧបទ្ទវហេតុសោកនាដកម្ម នៅមជ្ឈមណ្ឌលកោះពេជ្រ ដែលបណ្តាលឲ្យមានមនុស្សជាច្រើនរយនាក់ត្រូវស្លាប់ និងរង របួស។ ក្នុងគោលបំណងរួមចំណែកជួយសង្គ្រោះជាមួយរាជរដ្ឋាភិបាលកម្ពុជាចំពោះ ប្រជាពលរដ្ឋ ដែលរងគ្រោះដោយសារព្រឹត្តិការណ៍សោកនាដកម្មនេះ រដ្ឋាភិបាលចិន នឹង ផ្តល់ថវិកាចំនួន ៥០ ម៉ឺនដុល្លារអាមេរិក។
លោកទីប្រឹក្សាស្ថាទូតចិនក៏បានកោតសរសើរចំពោះចំណាត់ការរបស់រាជរដ្ឋាភិបាលកម្ពុជា ចំពោះឧបទ្ទវហេតុនៅកោះពេជ្រនោះ ហើយបានសន្យាថាស្ថានទូតនឹងជួយផ្សព្វផ្សាយបញ្ហា នេះដល់ក្រុមហ៊ុនចិននានាដែលរកស៊ីក្នុងប្រទេសកម្ពុជាឲ្យជួយផងដែរ។
ឯកឧត្តមបណ្ឌិត សុខ អាន ក្នុងនាមសម្តេចអគ្គមហាសេនាបតីតេជោ ហ៊ុន សែនបានមានប្រសាសន៍ថ្លែងអំណរគុណចំពោះរាជរដ្ឋាភិបាល និងប្រជាជនចិន ដែលបានជួយ ឧបត្ថម្ភ និងចូលរួមរំលែកទុក្ខជាមួយរាជរដ្ឋាភិបាល និងប្រជាជនកម្ពុជាចំពោះជន រងគ្រោះ ដោយសារឧបទ្ទវហេតុសោកនាដកម្មនៅកោះពេជ្រ។ ឯកឧត្តមឧបនាយករដ្ឋមន្រ្តីក៏បាន មានប្រសាសន៍អំពីការងារជួយសង្គ្រោះដែលរាជរដ្ឋាភិបាលកម្ពុជាបានធ្វើតាំងពីរាត្រីថ្ងៃទី២២ ខែវិច្ឆិកា ឆ្នាំ២០១០ ពេលកើតមានព្រឹត្តិការណ៍។ ឯកឧត្តម បណ្ឌិត សុខ អាន បានមាន ប្រសាសន៍ឲ្យដឹងថា សម្តេចអគ្គមហាសេនាបតីតេជោ ហ៊ុន សែន បានតាមដាន សភាពការណ៍នេះជាប់ ហើយសម្តេចបានចេញសេចក្តីថ្លែងការណ៍ជាបន្តបន្ទាប់តាមស្ថានីយ៍ ទូរទស្សន៍បាយ័នជំរាបជូនប្រជាពលរដ្ឋ អំពីចំណាត់ការរបស់រាជរដ្ឋាភិបាលក្នុងការជួយ សង្គ្រោះ ក្នុងនោះមានការបង្កើតគណៈកម្មការទទួលបន្ទុកដោះស្រាយករណីឧបទ្ទវហេតុ ដែលមានឯកឧត្តមជាប្រធាន និងអនុគណៈកម្មការបីទៀត ដែលក្នុងនោះមាន អនុគណៈ កម្មការទទួលបន្ទុកភារៈកិច្ចសង្គ្រោះបន្ទាន់ មានឯកឧត្តម អិត សំហេង រដ្ឋមន្រ្តីក្រសួង សង្គមកិច្ច អតីតយុទ្ធជន និងយុវនីតិសម្បទាជាប្រធាន អនុគណៈកម្មការទទួលបន្ទុកពិនិត្យធ្វើ កុសល្យវិច្ច័យករណីឧបទ្ទវហេតុ មានឯកឧត្តម ម៉ម ប៊ុនហេង រដ្ឋមន្រ្តីក្រសួងសុខាភិបាល ជាប្រធាន និងអនុគណៈកម្មការស៊ើបអង្កេតដែលមានឯកឧត្តម ព្រុំ សុខា រដ្ឋលេខាធិការ ក្រសួងមហាផ្ទៃជាប្រធាន។
ឯកឧត្តមឧបនាយករដ្ឋមន្រ្តី បានមានប្រសាសន៍ឲ្យដឹងថា មកដល់ពេលនេះ គណៈកម្មការបានរកឃើញប្រជាពលរដ្ឋដែលទទួលមរណៈភាពចំនួន ៣៤៧ នាក់ និងមាន អ្នករងរបួសកំពុងសំរាកព្យាបាលចំនួន ៣៩៥ នាក់។
ឯកឧត្តមបណ្ឌិត សុខ អាន បានមានប្រសាសន៍ថា គ្មានសញ្ញាអ្វីស្តីអំពី ភេរវកម្ម នោះទេ ហើយមូលហេតុនឹងត្រូវធ្វើការប្រកាសនាពេលឆាប់ៗខាងមុខនេះ។ ឯកឧត្តមបណ្ឌិត សុខ អាន ក៏បានមានប្រសាសន៍អំពីការជួយឧបត្ថម្ភរបស់រាជរដ្ឋាភិបាលនូវថវិកាចំនួន ៥ លានរៀលសំរាប់អ្នកដែលទទួលមរណៈភាព និង១លានរៀលសំរាប់អ្នករងរបួស ការជួយ ឧបត្ថម្ភពីព្រះមហាក្សត្រនូវថវិកា ២០០ ដុល្លារអាមេរិកសំរាប់អ្នកស្លាប់ និងអ្នករបួស ១០០ ដុល្លារអាមេរិក ដូចគ្នានិងព្រះវររាជបិតាដែរ។ ក្រៅពីនេះគឺការជួយឧត្ថម្ភពីក្រុមហ៊ុន កោះពេជ្រចំនួន ១០០០ ដុល្លារអាមេរិកសំរាប់អ្នកស្លាប់ និង ២០០ ដុល្លារអាមេរិកសំរាប់ អ្នករងរបួស និងការជួយឧបត្ថម្ភពីអាជ្ញាធរដែនដី ក៏ដូចជាការរៃអង្គាសមូលនិធិសង្គ្រោះដោយ ទូរទស្សន៍បាយ័ន និង ទូរទស្សន៍ CTN ផងដែរ ។
No comments:
Post a Comment