ស្ទឹងត្រែង: លោកឡុង វិចិត្រ ស្នងការនគរបាលខេត្តស្ទឹងត្រែងត្រូវបានដកហូតពីមុខតំណែង ហើយដែលទំនងជាពាក់ព័ន្ធ រឿងរ៉ាវមិនល្អមួយចំនួន ។
ប្រភពពីប៉ូលិសខេត្តស្ទឹងត្រែងបានឲ្យដឹងថា ការដកលោកស្នងការរូបនេះពិតជាពាក់ព័ន្ធនឹងបញ្ហានៅក្នុងស្ថាប័នមែន តែពួកគេមិនអាចអត្ថាធិប្បាយបានទេ។
អភិបាលខេត្តស្ទឹងត្រែងលោកឡូយ សុផាត បានទទួលស្គាល់ថា ពិតជាមានការដូរស្នងការនគរបាលនេះមែន តែលោកមិនបានផ្តល់ព័ត៌មានអំពីមូលហេតុនៃការដោះដូរនេះទេ ដោយលោកអះអាងថាជាកិច្ចការក្រសួងមហាផ្ទៃ។ ពិធីផ្ទេរតំណែងត្រូវគេគ្រោងនឹងធ្វើនៅថ្ងៃទី៤ ខែកុម្ភៈ ខាងមុខនេះ។
ស្នងការដែលត្រូវទៅកាន់តំណែងថ្មីជំនួសលោកឡុង វិចិត្រ គឺជាជាមន្ត្រីប៉ូលិសឈ្មោះលោករាជ្យ សុខុន មកពីក្រសួងមហាផ្ទៃដែលមានឋានៈជាអនុប្រធាននាយកដ្ឋានព្រហ្មទណ្ឌក្រសួង។
ប្រភពឲ្យដឹងថា កន្លងទៅមានរឿងអាស្រូវមួយចំនួនបានកើតឡើងនៅខេត្តស្ទឹងត្រែងមានដូចជា បញ្ហាគ្រឿងញៀន និងបទល្មើសព្រៃឈើខុសច្បាប់ដែលសមត្ថកិច្ចធ្លាប់ពាក់ព័ន្ធនឹងបទល្មើសទាំងនោះជាច្រើន៕
ដោយ : សេសាន
No comments:
Post a Comment