បន្ទាប់ពីបានអញ្ជើញចូលរួមមហាសន្និបាតសន្និសីទអន្តរជាតិគណបក្សនយោបាយនៅអាស៊ី(ICAPP) ដែលបានប្រារព្ធធ្វើនៅរាជធានីភ្នំពេញពីថ្ងៃទី០១ ដល់ថ្ងៃទី០៣ ខែធ្នូ ឆ្នាំ២០១០ ប្រកបដោយជោគជ័យរួចមក នៅថ្ងៃទី០៤, ០៥ ខែធ្នូ គណៈប្រតិភូ ICAPP អមដំណើរដោយ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្តី និងជារដ្ឋមន្រ្តីទីស្តីការ គណៈរដ្ឋមន្ត្រី បានអញ្ជើញទស្សនា ប្រាង្គប្រាសាទនានានៅក្នុងតំបន់អង្គរ រួមមាន៖ ប្រាសាទអង្គរវត្ត ប្រាសាទបាយ័ន្ត ប្រាសាទតាព្រហ្ម នៅក្នុងទឹកដីខេត្តសៀមរាប និងបាន ទស្សនាប្រាសាទព្រះវិហារដែលជាសម្បត្តិបេតិកភណ្ឌពិភពលោកដ៏ល្បីល្បាញ។ គណៈប្រតិភូ ជាន់ខ្ពស់ដែលរួមមានប្រធានរដ្ឋ អតីតប្រធានរដ្ឋ ប្រមុខរដ្ឋាភិបាល អតីតប្រមុខ រដ្ឋាភិបាល គណៈបក្សនយោបាយនៅអាស៊ីចំនួន១០០ មកពីប្រទេសប្រមាណ៤០ប្រទេស ត្រូវបានទទួលបដិសណ្ឋាកិច្ចស្វាគមន៍យ៉ាងកក់ក្តៅ ពីគណៈអភិបាលខេត្តសៀមរាប ខេត្ត ព្រះវិហារ ព្រមទាំងមន្រ្តីរាជការ និងអាជ្ញាធរពាក់ព័ន្ធជាច្រើននាក់។
ឯកឧត្តមចូសេ ដឺ វេណេស្យា (H.E José de venecia) ជាសហប្រធាន សន្និសីទ អន្តរជាតិ នៃគណៈបក្សនយោបាយនៅអាស៊ីប៉ាស៊ីហ្វិក ព្រមទាំងគណៈប្រតិភូនានាមួយ ចំនួនទៀតបានសំដែង ការកោតសរសើរអំពីការដឹកនាំដ៏ឈ្លាសវៃ របស់សម្តេចអគ្គមហា សេនាបតីតេជោនាយករដ្ឋមន្រ្តី ហ៊ុន សែន ដោយឈរលើសន្តិភាពដែលបានប្រែក្លាយ តំបន់សង្គ្រាមនានាឲ្យក្លាយទៅជាតំបន់ ដែលមានសន្តិភាព និងមានការអភិវឌ្ឍន៍ មិនតែ ប៉ុណ្ណោះឯកឧត្តម ចូសេ ដឺ វេណេស្យា បានថ្លែងការ កោតស្ញប់ស្ញែងចំពោះការដឹកនាំដែល ប្រកបដោយគតិបណ្ឌិតរបស់សម្តេចដែលបាន ប្រើប្រាស់នយោបាយឈ្នះឈ្នះមកដឹកនាំ ប្រទេសឆ្ពោះទៅរកភាពរីកចំរើន និងអភិវឌ្ឍន៍ មិនតែប៉ុណ្ណោះសម្តេចក៍ជាមេដឹកនាំ ដ៍កំពូល មួយរួបដែលមានការឈ្លាសវៃ និងចាស់ទុំខាងនយោបាយ និងអត់ធ្មត់ខិតខំដោះស្រាយ នូវជម្លោះជាមួយប្រទេសជិតខាងប្រកបដោយសន្តិវិធី រហូតទទួលបានជោគជ័យ ដែលនេះ ជាគំរូមួយសម្រាប់ប្រទេសមួយចំនួនក្នុងពិភពលោក ដែលកំពុងតែជួបប្រទះនូវបញ្ហានានា គួរយកគំរូនេះទៅដឹកនាំប្រទេសរបស់ខ្លួនដើម្បីស្វែងរកសន្តិភាព ជូនប្រជាពលរដ្ឋរបស់ខ្លួន។
នៅចំពោះមុខសម្តេចតេជោតាមរយៈជំនួបតាម Video Conference គណៈប្រតិភូក៏បាន ចុះហត្ថលេខាលើសេចក្តីថ្លែងការមួយស្តីអំពីជំហររបស់គណៈប្រតិភូ ICAPP ដែលមាន ចំណុចសំខាន់គឺ គណៈប្រតិភូបានទទួលស្គាល់ថា ប្រាសាទព្រះវិហារមាន លក្ខណៈ ពិសេសសកលជាសម្បត្តិបេតិកភណ្ឌពិភពលោក ទីពីរគឺបានសរសើរដល់ការ សម្រេច របស់គណៈកម្មការរបេតិកភណ្ឌពិភពលោក ដែលបានសម្រេចកាលពីខែកក្កដា ឆ្នាំ២០០៨ នៅទីក្រុងកេប៉ិកប្រទេសកាណាដា ដែលបានសម្រេចចុះឈ្មោះប្រាសាទព្រះវិហារ ចូល ក្នុងសម្បត្តិបេតិកភណ្ឌពិភពលោកថា ជាសេចក្តីសម្រេចដ៍ត្រឹមត្រូវ ទីបីគឺគណៈប្រតិភូមាន ការរីករាយពេញចិត្តនឹងដីការរបស់តុលាការអន្តរជាតិឆ្នាំ១៩៦២ ដែលសម្រេចថា ប្រាសាទ ព្រះវិហារជារបស់កម្ពុជាហើយចាត់ទុកថា ជាដំណោះស្រាយដោយសន្តិភាពមួយ ដែលផ្តល់ សន្តិភាពដល់កម្ពុជារហូតមកដល់បច្ចុប្បន្ន។
ប្រាសាទអង្គរវត្ត ជាស្នាដៃរបស់បុព្វបុរសខ្មែរ កសាងឡើងនៅដើមសតវត្សន៍ទី១២ ដោយ ព្រះបាទសូរ្យវរ័ន្មទី២ ប្រាសាទអង្គរវត្តមានលក្ខណៈល្អវិចិត្រ បង្ហាញនូវស្ថាបត្យកម្ម សិល្បៈ ខ្មែរដ៍អស្ចារ្យដល់កំពូល។ តមកគណៈប្រតិភូបានអញ្ជើញទៅទស្សនា និងវាយតម្លៃខ្ពស់ ចំពោះស្នាដៃ ដ៍អស្ចារ្យរបស់បុព្វបុរសខ្មែរ ដែលបានកសាងប្រាសាទបុរាណជាច្រើន បន្សល់ទុកជាសម្បត្តិមនុស្សជាតិ និងសម្បត្តិបេតិកភណ្ឌពិភពលោក។ បច្ចុប្បន្ននេះ រាជរដ្ឋាភិបាល រួមជាមួយប្រទេសជាដៃគូអភិវឌ្ឍន៍នានា បាននិងកំពុងធ្វើការអភិរក្ស និងអភិវឌ្ឍន៍ យ៉ាងយកចិតទុកដាក់បំផុត។
ដោយឡែកប្រាសាទព្រះវិហារជារមណីដ្ឋានប្រវត្តិសាស្ត្រ ដែលពីដើមមានឈ្មោះ ថាជា ភាសាសំស្រ្កឹតថា ស្រីសិខរេស្វារៈ ដែលមានន័យថា អទិទេពនៃកំពូលភ្នំ។ ប្រាសាទនេះ កសាងឡើងនៅចុងសតវត្សទី៩ និងសតវត្សទី១២ ប្រាសាទនេះបានសាងសង់ជាបន្តបន្ទាប់ ដោយមហាក្សត្រខ្មែរមួយចំនួន គឺក្នុងរជ្ជកាលព្រះបាទយសោវរ្ម័នទី១ (៨៨៩-៩១០), រជ្ជកាល ព្រះបាទសូរិយាវរ្ម័នទី១ (១០០២-១០៤៩), រជ្ជកាលព្រះបាទឧទ័យទិត្យវរ្ម័នទីII (១០៥០-១០៦៦) រជ្ជកាលព្រះបាទជ័យវរ្ម័នទី៦(១០៨០-១១០៧), រជ្ជកាលព្រះបាទធរនិន្រ្ទវរ្ម័នទីI (១១០៧-១១១៣) និងរជ្ជកាលព្រះបាទសូរ្យវរ្ម័នទីII(១១១៣-១១៤៥)។ ប្រាសាទព្រះវិហារ នេះគឺជាបណ្តាញនៃអាស្រមតាមជួរភ្នំដងរ៉ែកហើយ ត្រូវបានចាត់ទុកថា ជាកន្លែងសក្ការៈ បូជាដ៍ស័ក្តិសិទ្ធ នៃព្រះមហាក្សត្រនាសម័យចក្រភពខ្មែរ។
ជានិច្ចជាកាលសម្តេចតេជោប្រមុខ នៃរាជរដ្ឋាភិបាលកម្ពុជាតែងតែយកចិតទុកដាក់ដល់ គណៈប្រតិភូ ជាន់ខ្ពស់ ដែលបានធ្វើដំណើរទស្សកិច្ចនៅប្រាសាទព្រះវិហារនេះ ដោយ សម្តេចបានធ្វើការទាក់ទង មកសាកសួរសុខទុក គណៈប្រតិភូតាមរយៈការធ្វើ VIDEO Conference ដោយសម្តេចបានបញ្ជាក់ប្រាប់គណៈប្រតិភូអំពីតំបន់ប្រាសាទព្រះវិហារនេះថា ជាតំបន់ដែលទើបតែស្រោចស្រង់ចេញពីសង្គ្រាមតាមរយៈនយោបាយឈ្នះ ឈ្នះ របស់រាជ រដ្ឋាភិបាលកម្ពុជា។
No comments:
Post a Comment